انا مزاوكة فيكم عاونوني الله ايرحم ليكم الوالدين

السلام عليكم خوتي عواشركم مبروكة ..بغيت نقولكم انني من عشاق هاذ الموقع وكنستفيد منو بزاف وبغيتكم تعاونوني تاانا ايلا بغيو الله ايخليكم

انا عمري 22 سنة مخطوبة ودايرة العقد دابا سنتين ملي درنا الخطوبة وسنة كاملة مني درنا العقد .. ولكن غلطة حياتي هيا انني درت التوقيع على العقد

راجلي فالخاريج وعمرو مافكر يسيفطلي الريال الاصفر لا .. عمرو ماقال راه مرتي خاصني نعاونها وعارفني انه الحالة المادية ديالي ماشي ميسورة بزاف .. عامين دابا عمرو ماعطاني نشري كسوة لا العيد لا لعاشورة لا لحتى حاجة

ماكاتنبغيش نطلب منو حيت مابغيتش ياخذ فكرة انني طماعة .. كايهدر معايا مرة فالشهر .. وملي كايهدر معايا كايسولني على الجو والخدمة .. ماكايقولي حتى كلمة زوينة ولا يحن فيا ايلا قالي يقولي حملة وزوينة فشهر ولا شهرين بخل عاطفي ومادي رهيب والله

صراحة انا مليت هاد البرود ديالو كامل كلما هدرت معاه يقولي را غادي نتبدل ولكن كايتبدل سيمانة ويولي كيفما كان فالاول

الله ايخليكم انا طلعلي هاد الشي بزاف فراسي وليت مريضة نفسيا وكنقمع راسي بزاف وبغيت نفسخ هاد العقد .. اللي عندو شي فكرة على العقد ملي يتفسخ واش بوزاف ديال الاجراءات ولا شنو وشحال يكلفني داك الشي علما انه عطاني الصداق ديال وشريت بيه الذهب